Kişi şahmatçılarımız yenə də "ənənə"yə sadiq qaldı. Dünyanın ən güclü şahmat ölkələrindən biri sayılan Azərbaycan bu dəfə də komandalar arasında dünya çempionatında medal üzünə həsrət qaldı. İllər ötsə də, millimizin "stabilliyi" dəyişmir ki, dəyişmir. Görünən də budu ki, heç dəyişən də deyil.
Dünya çempionatının startı öncəsi Azərbaycan Şahmat Federasiyası (AŞF) "namizədlər turniri" təşkil etdi. Qısa zaman kəsiyini əhatə edən yarışda Qədir Hüseynovla Rauf Məmmədov da iştiraka məcbur edildi. Ancaq eyni tələb Şəhriyar Məmmədyarov və Teymur Rəcəbov qarşısında qoyulmadı.
Niyə?
Adını qoydular ki, bu ikili dünyanın Top şahmatçıları sırasındadır. Ancaq həqiqət başqa idi. Məmmədyarov buna normal yanaşsaydı da, Rəcəbovun nəinki belə turnirdə iştirakı, heç Bakıya gətirilməsi mümkün deyildi! AŞF rəhbərliyi də bunu çox gözəl bildiyi üçün komandada ayrıseçkilik etdi.
'Namizədlər turniri" barədə söz düşmüşkən bir məqam da xüsusi vurğulanmalıdır. Partiyaların gedişatı canlı yayımlanmadı.
Niyə?
Qərəz, bu mini turnirin qalibi Aydın Süleymanlı oldu. Bu, hansı anlama gəlməli idi? Ədalət prinsiplərinə söykənsək, Aydın 3-cü lövhəni mühafizə etməli idi. Lakin AŞF rəhbərliyi yekun cədvəli arxa plana atdı. Əsas "zərbəçilər" yenə ənənəvi kvartet oldu: Şəhriyar Məmmədyarov, Teymur Rəcəbov, Qədir Hüseynov və Rauf Məmmədov. Bu heyət start heyəti olacaqdısa, Qədirlə Raufu bu yarışa qatmaqda hansı məqsədlər güdülürdü? Vüqar Əsədli ilə Aydın Süleymanlı isə 6 komandanın mübarizə apardığı B qrupunda hərəyə 2 dəfə lövhə arxasına keçmək şansı qazandı. İndi isə təmsilçilərimizin statistik göstəricilərinə diqqət yetirək: hər birinin keçirdiyi partiya, topladığı xal və faiz nisbətini təqdim etmək zamanıdı.
Şəhriyar 6/4 - 66,6%
Teymur 7/2,5 - 35,7%
Qədir 5/3,5 - 70%
Rauf 6/3 - 50%
Vüqar 2/1,5 - 75%
Aydın 2/0,5 - 25%
Göründüyü kimi, ən yüksək göstərici Vüqar Əsədli, Qədir və Şəhriyardadısa, ən bərbad nəticələr milli komandamıza hər zaman naz edə-edə gələn Teymur Rəcəbov və "Namizədlər turniri"ndə yumşaq desək, qəribə formada qalib olan Aydın Süleymanlı de-fakto, komandamızı DÇ-nin "Dördlər finalı"ndan məhrum etdi.
Biz AŞF-ni tənqid edəndə hansısa səbəb, bəhanələr axtarmaq əvəzinə, Federasiya rəhbərliyini milli maraqlara xidmət etməyə çağırırıq. Azərbaycanda şahmatı çox yüksəyə qaldırmaq çətin məsələ deyil. Yetər ki, işinə peşəkar yanaşasan.
CEYHUN ƏLİYEV
