Bu gün İspaniyanın Valensiya şəhərində bədii gimnastika üzrə 40-cı dünya çempionatı start götürür. 1917-ci ildən nəhəng tədbirlərin keçirildiyi məşhur Feria Valencia sərgi mərkəzi zərif cins nümayəndələrinin ixtiyarına buraxılacaq.
Yarışda Azərbaycan da daxil olmaqla 62 ölkədən 222 gimnast iştirak edəcək. Fərdi yarışlarda ölkəmizi 2023-cü il Avropa çempionatının mükafatçısı Zöhrə Ağamirova, İlona Zeynalova və yeniyetmələr arasında 2022-ci il Avropa çempionatının bürünc mükafatçısı Kamilla Qafarova təmsil edəcəklər. Avro-2023-ün qalibləri və ötənilki dünya çempionatının mükafatçıları Güllü Ağalarzadə, Ləman Əlimuradova, Kamilla Əliyeva, Zeynəb Qummətova və Yelizaveta Luzan qrup hərəkətlərində çıxış edəcəklər.
Çempionat halqa və topla fərdi təsnifat yarışları ilə başlayacaq. Bu növlərdə Zöhrə Ağamirova və İlona Zeynalova qüvvəsini sınayacaq. Onlar üçün yarışlar Bakı vaxtı ilə saat 19:30-dan sonra başlayacaq.
Ümumilikdə fərdi birincilikdə 88 gimnast iştirak edəcək ki, onlardan 18 ən güclüsü çoxnövçülükdə medalçıları müəyyənləşdirəcək. Ayrı-ayrılıqda hər növdə isə 8 zərif cins nümayəndəsi final mərhələsinə yüksələcək.
Bu gün halqa və topla həm funalçılar, həm də medalçılar müəyyənləşəcək. Bu növlərdə final mərhələsinə Bakı vaxtı ilə saat 23:00-dan etibarən start veriləcək.
Sabah gimnastlar gürz və lentlə çıxış edəcəklər. Sabahkı təsnifat mərhələsinin yekunlarına əsasən, nəinki səkkiz finalçı (finallar sabah baş tutacaq), həm də şənbə günü, avqustun 26-da keçiriləcək çoxnövçülük üzrə finalın 18 iştirakçısı müəyyənləşəcək.
Çempionat 2024-cü ildə Parisdə keçiriləcək Olimpiadaya vəsiqə qazanmaq baxımından çox əhəmiyyətlidi. Məsələ burasındadır ki, çoxnövçülükdə finallara vəsiqə əldə edən 18 gimnastdan 14-ü Parisə vəsiqə əldə etmiş olacaq. Əsasnaməyə görə Olimpiadada bir ölkədən maksimum 2 bədii gimnast iştirak edə bilər. İtaliya, Bolqarıstan və Almaniyanın isə artıq 1 lisenziyası olduğu üçün, onlar final mərhələsində istənilən uğurlu nəticəyə imza atsa belə, yalnız 1 lisenziya əldə edə biləcəklər. Dolayısı ilə qızlarımızdan çoxnövçülükdə final mərhələsinə vəsiqə qazanan olarsa, de-fakto, Olimpiadaya lisenziya əldə etmiş olacaq.
Bədii gimnastlarımız üçün həqiqət anı
